Tubig sa sapa miawas

CEBU, Philippines – Dul-an 40 ka mga tawong nagpuyo ilawom sa Panganiban Bridge sa dalan Colon Street dinhi sa dakbayan sa Sugbo ang diriyot mabanlas sa kalit nga pagsuyla sa tubig sa Guadalupe River pasado alas 3 kagahapon sa hapon.

Si Epetacio Magdadaro, 42, kargador, nga usa sa mga nagpuyo sa ilawom sa tulay nga nahinabi sa Banat News kini miingon nga kalit kaayong midako ang tubig ilawom sa tulay human mibundak ang kusog nga ulan kagahapon sa hapon.

Ilawom sa tulay dili mominos lima ka mga pamilya ang nagpuyo nga dunay gibana-bana nga kapin napulo ka mga bata’ng gagmay. Sumala pa ni Magdadaro nga samtang sila namahuway sa ilawom ila na lang nabantayan nga midako na ang tubig hinungdan nga nagpadaplin sila sa kilid ilawom sa tulay, apan naapsan sila sa bul-og niini hangtod nga nalapawan na ang ilang gipuy-an.  “Maayo gani sir naa’y kabilya nga nahawiran nako, didto ko nakakapyot unya ang asawa naku ug mga anak sa liog na pod naku mihawid, hasta ang mga silingan namo,” matud pa ni Magdadaro.

Usa ka bata nga babaye edad 10 anyos ang gidala sa tambalanan sa taga Emergency Medical Services (EMS) human nakainom og daghang hugaw nga tubig sa baha.

Si Konsehal Arnold Cambonga, chairman sa peace and order sa barangay San Nicolas  nga  nahinabi sa Banat News miingon nga dugay na nilang gibadlong ang mga nagpuyo sa ilawom sa tulay apan wa mopatuo. Samtang upat ka balay ang naguba sa baha ug 10 ang nasudlan og tubig sa barangay Tisa, sa dakbayan sa Sugbo tungod sa kusog nga bunok sa uwan.

Matud ni Kapitan Philip Zafra nga nahitabo kini sa sapa sa Kinalumsan River sa Sitio Quitolimbo, Barangay Tisa. – /EIM) (BANAT NEWS)