Mga job order sa Talisay mag-rally karon

CEBU, Philippines – Gikatakda’ng ipakatap ni Superintendent Germano Mallari, hepe sa Talisay City Police Station, ang iya’ng mga sakop sa City Hall karong adlawa gumikan sa hulga’ng rally nga pagahimuon sa mga job order nga kawani nga wa masweldohi sa kagamhanan.

Matud ni Mallari nga sayo pa lang sa buntag iya na’ng ipakatap ang mga sakop labi na sa session hall kay atol man kini sa regular session sa konseho.

"Ipatuman namo ang maximum tolerance kay katungod man sab kini sa mga tawo pagpagawas sa ila’ng sentimento," matud ni Mallari.

Apan iya’ng gipasabot nga aduna’ limitasyon ang katungod sa mga raliyista labi na og sila mopakita og bayolente’ng lihok.

Sa nasayran nga nibahad ang mga raliyista nga kandaduhan nila ang session hall.

Matud sa hepe sa kapolisan nga kun kini mahitabo dili sila magpanuko sa pagsikop sa mga tawo nga mohimo sa ingon.

Ang mga raliyista ang nakakuha og permit sa pag-rally sa opisina ni Mayor Johnny de los Reyes niadto’ng niagi’ng semana.

Ila’ng ralihan ang konseho tungod kay wala sila masweldohi isip job order nga kawani diin base sa pamahayag ni delos Reyes gilaslasan sa konseho ang budget.

Apan si Bise Mayor Romeo Villarante niingon nga gilaslasan nila ang budget pero may gigahin gihapon sila nga pundo alang sa pagkuha og job order nga moabot sa 700 kabuok matag buwan.

Nagkanayun si Villarante nga ang mayor wala nituman kay nikuha kini og mokabat sa 1,000 ka job order.

"Naproblema jud siya asa isweldo kay sobra man ang iya’ng gikuha nga JO unya ang nakapait kay ang konseho ang iya’ng pasanginlan sa iya’ng kasaypanan," dugang ni Villarante.

Siya nanghinaut nga unta motimbang sa isyu ang katawhan aron mapabilin ang kahapsay ug kalinaw sa siyudad inay mutuo dayun sa usa ka politiko nga mohatag og sayop nga impormasyon. – /GMR) (BANAT NEWS)