DOJ moimbestigar sa Lumad killings

CEBU, Philippines – Suportahan sa Malacañang ang panawagan sa mga opisyales sa Simbahang Katoliko pagpahigayon og “honest, thorough, impartial, and speedy" nga imbestigasyon kabahin sa pagpatay sa tulo ka mga lider sa mga Lumad sa Surigao del Sur.

Si Communications Secretary Herminio Coloma Jr. sa interbyu kaniya sa gipanag-iya sa gobiyerno nga sibyaanang dzRB nagkanayon, nilihok na ang Department of Justice paghimo og inter-agency probe sa maong krimen.

Niadtong Septiyembre 1, gipatay atubangan sa mga Lumad ang ilang mga lider nga sila si Dionel Campos , Datu Juvello Sinzo ug ang school director sa Alternative Learning Center for Agricultural and Livelihood Development (Alcadev) nga si Emerito Samarca.

Ang Catholic Bishops' Conference of the Philippines (CBCP) pinangulohan ni Lingayen-Dagupan Archbishop Socrates Villegas sa sayo pa misaway sa administrasyong Aquino tungod sa wala niini pag-aksyon batok sa Magahat/Bagani Force nga maoy gitumbok nga responsable  sa maong linoog nga pagpatay.

Ang Magahat/Bagani Force usa ka paramilitary organization nga kaabag sa military sa kampanya niini kontra insurhensiya sa maong probinsya. Tungod sa kahadlok sa mga Lumad, liboan kanila ang nibiya sa Lianga padung sa Tandag City. Ang grupong Karapatan midangop na sa UN Human Rights Council ug nanawagan paghimo og imbestigasyon batok sa gobiyerno bahin niini. Ilang gibasol ang counter-insurgency programs sama sa Oplan Bayanihan sa Armed Forces of the Philippines nga hinungdan nganong adunay mga paramilitary groups nga nagabuso karon ug gipasanginlan usab nila nga nagkunsabohay ang mga paramilitary units ug AFP.

Apan ang AFP kusganong mikondenar sa pagpatay sa mga Lumad ug ilang gihimakak nga aduna sila’y kalambigitan sa kagubot karon tali sa mga nagkadaiyang grupo sud sa katilingban sa mga Lumad sa Surigao del Sur.

"The AFP is not connected to any group involved in the tribal conflict now happening particularly in Lianga, Surigao and will not tolerate any group espousing violence in any community," matud pa sa ilang pamahayag.

Gihangop usab nila ang pagdangop sa Karapatan ngadto sa UN, apan giawhag nila ang grupo nga mahimong patas ug angay nilang apilon og reklamo ang New People's Army nga maoy responsable sa mas daghan pang kaso sa pagpatay sa mga Lumad sa maong probinsya.

"Let Karapatan fight for all the atrocities committed by any group and not just [focus] on the alleged crimes committed by one while turning a blind eye on the heinous crimes committed and publicly admitted by the NPA," matud pa sa militar.  Sumala pa sa AFP, sugod niadtong 1998 hangtud 2008, mokabat na og 357 ka Lumad ang gipatay sa NPA, niadtong 2009 miabot og 83 ka sibilyan ug 24 ka Lumads ang gipatay ug giangkon sa NPA. Tuig 2010 usab dihang gipatay sa mga NPA ang managsuong Lumad gikan sa pamilyang Tulang sa Davao City, ang duha gi-torture una pa gipanggapos ug gipamusil. (Gikan sa Wires/EIM)