Naigo sa kilat nasunog

CEBU, Philippines - Patay nang napalgan ug naglutaw sa dagat ang usa ka mananagat nga gituohang naigo sa kilat diha sa Parola, Brgy. Poblacion, sa lungsod sa Cordova niadtong Huwebes sa buntag.

Si Police Officer 3 Vilma Degamo sa Cordova Police Station miila sa namatay mao si Bernardo Inoc  Escabas,  61,  taga Sitio Casipac,  Catarman sa nahisgotang lungsod.

Matud pa ni Degamo nga buntag pa migikan sa ila si Escabas aron mangisda sa Parola apan gikatahong naabtan kini pagbundak sa uwan nga gidunganan sa panugdog ug kilat.

Alas 3 pasado sa hapon napalgan na lamang ang sakayan ni Escabas  nga nag utaw-utaw sa kadagatan nga nabuak ug daw nasunog apan wala na si Escabas niini.

Dangtan ang pipila ka oras, ilang nasigpatan si Escabas nga naglutaw sa dagat sa Brgy. Poblacion ug nasunog ang kalawasan niini. Gidudahan nga naigo kini sa kilat.

Alas 5 na pasado sa hapon nakuha ang lawas ni Escabas ug gisugyot sa kapolisan ang pagpa-autopsy sa patay’ng lawas aron mahibaw-an kun unsay gikamatyan niini.(Romeo T. Limpangog/EIM)(BANAT NEWS)