Sugbo supplier sa marijuana

CEBU, Philippines - Giila karon ang Sugbo isip supplier sa marijuana ngadto sa ubang bahin sa Kabisay-an.

Kini ang gitug-an sa direktor sa Philippine Drug Enforcement Agency-7, Jeffrey Bangsa, base sa mga nakuha nila nga impormasyon sa pagpaniid sa mga tigpayuhot sa naasoy nga ginadili nga tanum.

Gitumbok ang dakbayan sa Danao, lungsod sa Badian ug Balamban ang gigikanan sa marijuana. Ang kahimtang sa panahon sa naasoy’ng mga dapit ang hinungdan nga maayo ang tubo sa mga marijuana.

Matud ni Bangsa nga ang marijuana sa lungsod sa Badian ang may labi’ng maayo’ng kalidad sa marijuana kay gawas nga bugnaw ang lugar abunda sab kini sa tubig.

Tuyo ni Bangsa nga kung aduna man sila’y operasyon ila’ng seguruhon nga may madakpan nga tigtanum aron magsilbi kini nga pahimangno sa uban nga gusto’ng mosulod sa mao’ng ilegal nga negosyo.

Hinuon masaligon si Bangsa nga uban sa abag sa katawhan ila ra madumduman ang mga dagku’ng plantasyon sa marijuana sa nagkadaiyang dapit sa Sugbo.  (BANAT NEWS)