Garbage truck gibangga sa flyover

CEBU, Philippines – Usa ang angol diha’ng ang garbage truck sa Department of Public Services sa dakbayan sa Sugbo ang nabangga sa flyover sa Mambaling human nawagtangi og brake sa pagdulhog sa taytayan sa N. Bacalso Avenue.

Ang dump truck padulong sa Inayawan alang sa transfer station sa mga basura.

Matud ni Carlito Solon, driver sa garbage truck, nga gihuwaman sa barangay Sambag 2 ang sakyanan gumikan kay guba ang ila’ng garbage truck.

Sumala pa ni Solon gi-check niya ang sakyanan apan sa diha’ng iya na kini’ng gipadagan nawagtangan hinuon sila og brake sa pagdulhog sa taytayan.

Dugang ni Solon nga laraw unta niya nga ibangga sa poste apan iya’ng nahuna-hunaan nga mas daku ang kadaut hinungdan nga iya’ng gipaningkamutan nga adto ipadip-ig sa kilid sa flyover. Si Solon nibutyag nga ang sakyanan ka duha na nadisgrasya diin ang una diha’ng gigamit sa barangay Lahug.

Ang kauban ni Solon nga si Clyde Lechido, 47, nakaangkon og samad sa tuhod diha’ng nilayat human gisugo  nga mokuha og bato aron iali sa ligid sa dump truck.

Ang laing pasahero nga minor de edad wala hinuon naunsa sa mao’ng insidente.

Si Engr. Rolly Ardusa, hepe sa DPS, mopaimbestigar kung tinuod ba nga brake ang hinungdan ug kung dili, manubag ang drayber ug ang insurance ang mogasto sa pagpaayo.

Gibutyag ni Ardusa nga sagad sa problema sa dump truck ang brake hinungdan nga sa napulo ka yunit, upat na lang ang magamit. – /GMR) (BANAT NEWS)