Duha ka suppliers kwalipikado
CEBU, Philippines – Gideklarar sa Bids and Awards Committee sa Kapitolyo nga duha na lang ang kwalipikado nga mo-supply sa paliton nga heavy equipment balor og P254 milyones.
Kini mao ang RDAK Transport Equipment sa kantidad nga P235,050,000 ug Civic Merchandising Inc.-Volvo Construction Equipment sa kantidad nga P237,168,000.
Matud ni Provincial General Services Officer Jone Siegfred Sepe kinsa sakop sa BAC, nga ang RDAK isip labing ubos nga presyo ila’ng ipaubos sa post-qualification evaluation apan kung dili kapasar, ila’ng isunod ang Civic Merchandising.
Ang abogado sa Civic nga si Atty. Johnson Hontanosas nipadayag sa ila’ng obserbasyon nga ang joint venture sa RDAK tali sa usa ka wala ipaila nga kompaniya dili rehistrado sa Securities and Exchange Commission.
Nagduda si Hontanosas nga wala pa kasuway ang kompaniya og supply sa ingon ka daku nga kantidad sa heavy equipment.
Ang kompaniya giingong wala usab nipalit og bid documents nga usa sa nag-una’ng rekisitos sa pagsalmot sa bidding.
Ang Civic Merchandising mao lang usab ang nakatuman sa Republic Act No. 8495, kon ang Philippine Mechanical Engineering Act of 1998.
Matud sa chairman sa BAC, Provincial Administrator Mark Tolentino, nga ila’ng tukion ang obserbasyon lakip na ang mosyon sa laing duha ka suppliers nga wala nipasar nga mao ang TKC Heavy Industries ug ConEquip Philippines nga adunay kuwang sa ila’ng dokumento.
Ang mga heavy equipment naglangkub sa lainlaing brand sa boom truck, bulldozers, dump trucks, forklift, water tank truck, excavator, wheel loader, motor grader, road roller, lift truck ug 10-wheeler self loading truck. (BANAT NEWS)
- Latest
