CEBU, Philippines – Lakip na sa pipila ka lungsod sa probinsiya sa Sugbo ang mopatuman sa firecrackers zone niini’ng nagsingabot nga Pasko.
Ang konseho sa lungsod sa Barili nipasar sa Firecrackers Zone Ordinance nga gipangamahanan ni Konsehal Rene Alquizola.
Sa Poblacion, adunay lugar sa kiosko sa plaza nga mao’y gitudlo nga firecrackers zone. “Ang tuyo nato niini mao nga wala unta’y madisgrasya, masamdan, mahilos, maputlan sa mga tudlo,” matud ni Alquizola.
Ang firecrackers zone dili usab paduolan sa kabataan.
Matud ni Alquizola nga sa barangay ila’ng gitugyan sa mga opisyal ang pagtudlo usab og firecrackers zone.
Si Alquizola supak sa pabuto nga usik lang sa kwarta samtang ang init ug aso sa pagbuto nakadugang lang sa global warming. Alang niya daghang paagi nga magsadya sa Pasko.
“Busa kung ikaw gusto magpabuto, be sure to do it the safe way,” dugang ni Alquizola. (BANAT NEWS)