7-anyos gihaylo og pan, gilugos
CEBU, Philippines – Usa ka bata gihaylo og pan sa lalaki nga wala niya hiilhi ug midala kaniya sa kalibonan didto sa Barangay Puting Bato, dakbayan sa Toledo ug didto kini gilugos.
Matud sa kapolisan sa Toledo nga ang lalaki nga naglugos sa bata miadto sa Puting Bato ug nagpatuo nga moduaw sa iyang igsuon. Gitanyagan ang bata nga palitan siya’g pan aron ubanan usab siya pagpangita sa balay sa iyang igsuon.
Ang biktima may kauban unta nga laing bata apan gipapauli kini sa tawo human usab kini hatagi’g pan. Saysay sa biktima nga gidala siya sa kasagbotan nga bahin ug didto giamong-amongan.
Naghilak na lang ang bata nga mipauli sa ilang balay ug mitug-an sa iyang mga ginikanan nga siya gilugos sa tawo nga nagpauban kaniya nga mangita sa balay sa iyang igsuon nga nagpuyo sa ilang dapit.
Sigun sa pakisusi sa kapolisan ilang nahibaw-an nga ang tawo nga milugos sa bata taga lungsod sa Pinamungajan mao nga naghimo na sila og follow-up operations.
Ang biktima dali nga gidala sa Toledo City Social Welfare Development Office ug gikatakda nga dad-on kini sa pink room sa Vicente Sotto Memorial Medical Center (VSMMC) aron ipahiling sa doktor. – /RUB) (BANAT NEWS)
- Latest
