CEBU, Philippines - Ang kapolisan sa dakbayan sa Mandaue nagtuo na g’yud nga masulbad na nila ang pagpatay ni Atty. Amelie Alegre nga gibanhigan sa duha ka tawo samtang luwan sa iyang sakyanan.
Si Mandaue City Police Office (MCPO) director Mariano Natuel Jr. mipahibalo nga may hulagway na sila sa mga kriminal nga mitukma g’yud sa cartographic sketch nga gihimo base sa pamahayag sa mga saksi.
Giisip ni Natuel nga 80 porsiyento nga ang hulagway mitakdo sa “facial composite” sa nagpusil ug mipatay ni Atty. Alegre apan mihimo pa sila og dugang imbestigasyon.
Nagpasabot kini nga hapit na mailhan sa kapolisan sa dakbayan sa Mandaue kun kinsa ang mibanhig kang Atty. Alegre nga nakapaangol usab sa laing abogado nga si Briccio Boholst ug Antonio Pino nga kauban ni Alegre sa mao nga higayon. Ang mga imbestigador sa kapolisan sa Mandaue walay hunong sa paghimo’g imbestigasyon sa mao nga kaso aron kahatagan kini og kasulbaran. (Decemay P. Padilla/RUB)(BANAT NEWS)