Pinabuthang isda nasakmit

CEBU, Philippines - Nikabat sa 25 ka banyera’ng isda nga toloy nga giingong pinabuthan ang gisakmit sa Cebu Provincial Anti-Illegal Fishing Task Force (CPAIFTF) kagahapon sa buntag sa lungsod sa Tuburan. Unom niini ang gikarga sa Mazda pick-up nga may plaka YKP-109 nga gipanag-iya ni Bonifacio Siarot nga nasikop alas 5:50 sa buntag gikan sa lungsod sa San Remigio.

Ang tag-iya sa mga isda giila nga si Rosita Siarot kinsa nasikop uban sa laing tulo ka tawo nga sila si Joel Agag, Justin Albaño ug Bonifacio Siarot, pulos residente sa lungsod sa Balamban.

Alas 7:20 sa buntag, usa ka Isuzu Elf nga may plaka XPC-565 nga narehistro ubos sa Christ’s Commission Foundation, Inc. sa Mandaluyong City ang nasikop nga gikargahan sa 19 ka banyera’ng pinabuthang isda gikan sa lungsod sa Medellin.

Nasikop si Rustom Aviles, drayber ug tag-iya sa mga isda, Janet Aviles ug Edmund Lapitin, pulos residente sa Antipolo, lungsod sa Medellin.

Matud ni fish examiner Rudillo Codilla nga pulos pinabuthan ang mga isda.  Ang hepe sa Provincial Environment and Natural Resources Office (PENRO) ug officer-in-charge sa CPAIFTF, Atty. Chad Estella, nibutyag nga ang mga naimbargo nga isda gihatag sa nagkalain-laing women and children centers.

Matud ni Estella nga maghuwat sila sa mando ni Gobernador Hilario Davide III kung ipatanggong o buhian ba ang mga dinakpan nga pabayron sa multa nga P5,000 matag kilo sa isda ubos sa Cebu Fisheries Code samtang pasakaan sila og kaso. (Brenda D. Batuto/GMR)(BANAT NEWS)