CEBU, Philippines - Hangtud karong adlawa adunay laing hugna sa mga delegado sa APEC Summit nga padayong mobisita sa mga tourist attractions dinhi sa dakbayan, apil na sa Magellan’s Cross duol sa Basilica del Santo Niño.
Ang mga delegado sa APEC Summit nga mibisita kagahapon sa Magellan’s Cross giabi-abi og sayaw sa mga tigbaligya og kandila diha sa Plaza Sugbo nga nakapahimuot kaayo sa mga bisita.
Si Ranulfo Sebusa, ang chief security officer sa City Hall, miingon nga hangtud karong adlawa estrikto nila nga idili ang pagpa-parking sa mga sakyanan diha sa atubangan sa City Hall.
Kini aron hawan ug hapsay ang dapit sa Plaza Sugbo inig-abot sa mga delegado sa APEC Summit.
Mga 30 ka traffic enforcers nga nagsakay og motorsiklo ang gidestino sa pagkuyog sa convoy sa mga delegado aron tulin ang ilang pagpanaw gikan sa usa ka heritage place ngadto sa laing lugar nga ilang adtoan.
Apil sa gibisitahan sa mga delegado sa APEC mao ang kapin sa 400-anyos na nga simbahan sa Basilica del Santo Niño. Ang tigpasiugda sa APEC Summit nagpasalamat sa mga opisyal sa kapolisan ug kagamhanan sa dakbayan sa Sugbo sa pagsiguro nila sa siguridad sa ilang mga delegado. (BANAT NEWS)