CEBU, Philippines - Ang Department of the Interior and Local Government (DILG) mopadayon karong Lunes sa paghimo og pormal nga imbestigasyon sa kaso nga gipasaka batok ni Mayor Michael Rama.
Ang kaso nga husayon ni DILG hearing officer Atty. Isidro B. Barrios III naglambigit niadtong paghatag og tag P20 mil nga calamity financial assistance sa mga opisyal ug kawani sa Cebu City Hall kaniadtong 2013.
Matud ni Barrios nga ang husay anha gihapon himoa sa DILG-7 regional office sa Sitio Sudlon sa Barangay Lahug gikan sa Lunes ngadto sa adlaw’ng Huwebes sunod semana.
Si Atty. Reymelio Delute nga maoy mipasaka og reklamo batok ni Mayor Rama maoy paatubangon sa ipadayong paghusay alang sa “direct examination” nga himuon sa iyang abogado nga si Ben Militar.
Diha sa direct examination ibatbat ni Delute ngano nga nakaingon siya nga si Mayor Rama ug ang ubang gipasakaan niya’g kaso nakahimo og kalapasan sa balaod.
Paatubangon usab nila ni Delute ang usa ka reporter sa mantalaan nga misuwat sa balita diin si Mayor Rama miangkon nga ang nadawat niya nga P20 mil gigamit niya pagbayad sa tubig ug kuryente.
Matud ni Delute nga base sa pamahayag ni Rama nagpakita kini nga wala gayud siya mabiktima sa linog ug bagyo’ng Yolanda sa hinapos niadtong 2013.
Si City Legal Officer Jerone Castillo miingon nga motambong sila sa pagpadayon sa imbestigasyon ug naghinam-hinam siya nga mohimo og cross examination ngadto ni Delute.
Ang cross examination mao nga ang abogado sa sinumbong makahimo sa pagpasupot og pangutana sa witness sa ilang kaatbang aron tuison ang ilang pamahayag.
Matud ni Delute nga ang lig-on niya nga basehanan nga nakahimo’g sayop si Mayor Rama mao ang report sa Commission on Audit (COA) nga nagdeklarar nga wala masubay ang tukmang lagda sa paggasto og P84 milyones nga calamity assistance nga gihatag sa kapin 4,200 ka opisyal ug kawani sa City Hall. (BANAT NEWS)