1 patay, 7 angol apil polis, sa aksidente

CEBU, Philippines - Usa ka tawo ang namatay ug pito ang nangaangol, apil ang usa ka polis, sa managlahi nga aksidente sa karsada didto sa dakbayan sa Mandaue ug sa dakbayan sa Toledo.

Nagkabangga ang duha ka motorsiklo didto sa Barangay Canduman, Mandaue nga misangpot sa kamatayon sa 50-anyos nga si Emmanuel Tiempo, taga Barangay Maguikay.

Ang nangaangol mao sila si SPO2 Jerry Trinidad Vizcayno, sakop sa Toledo City Police Station; Fred Jead Blaza Compacion, 22, taga Pulpogan, Consolacion ug William Bostoln Mack, 43, taga Maguikay, Mandaue.

Ang motorsiklo nga gimaneho ni Tiempo nagpaingon sa Talamban, dakbayan sa Sugbo ug angkas niya si Mack nga iyang silingan.

Pag-abot sa highway sa eskina Canduman, gikabangga niini ang motorsiklo nga gimaneho ni Compacion.

Ang mga biktima dali nga gidala sa Eversley Child Sanitarium General Hospital sa Barangay Jagobiao apan si Tiempo gideklarar nga patay na.

Samtang sa Toledo, lima ka tawo ang naangol sa managlahi nga aksidente sa kadalanan. Upat ang nalandig sa tambalanan human nasaghiran sa motorsiklo ang usa ka tigulang nga naglakaw didto sa Barangay Cabitoonan.

Ang motorsiklo nga gimaneho ni Efren Bagahansol, 23, adunay duha ka angkas nga sila si Jobert ug Jerney Tangoan, taga Barangay Tajao, Pinamungajan diha nga ilang nabag-iran si Carmelito Dolino, 60.

Ang tiguwang natumba ug naguyod pa g’yud sa motor.

Matud sa kapolisan nga walay lisensiya si Bagahansol ug walay dokumento ang motor.

Sa laing bahin, si SPO2 Vizcayno nagsakay sa iyang motorsiklo didto sa Barangay Awihaw, Toledo diha nga nabag-iran siya sa usa ka Hyundai Starex van nga gimaneho ni Jackson Cabanada.Nakaangkon lang og mga pangos ang polis. (BANAT NEWS)