500 nadugang sa seniors sa siyudad
CEBU, Philippines - Dugang 500 ka senior citizens ang makadawat sa una’ng higayun sa ila’ng financial assistance gikan sa kagamhanan sa dakbayan sa Sugbo.
Matud ni Doming Chavez, pangulo sa Office of the Senior Citizens Affairs, nga mokabat na sa 60 mil ka senior citizens sa dakbayan ang ila’ng sakop nga hataganan og ayuda sa kagamhanan. Ang nadugang mao’y hulip sa mga nitaliwan na ug natangtang sa listahan gumikan kay wala na nikobra sulod sa tulo ka higayun. Sumala pa ni Chavez nga aduna pa sila’y 1,300 ka senior citizens nga naghuwat nga makadawat sa financial assistance.
Gibutyag ni Chavez nga kung maaprobahan ang ila’ng gipangayo nga P20 milyones nga supplemental budget, posible’ng makarga ug mahatagan ang tanang senior citizens nga naa sa listahan nga nagpaabot. Wala pa’y tukma nga listahan si Chavez kung pila ang wala kadawat sa mga senior citizens niadto’ng pagpangapod-apod nila sa Hulyo 28 ug padayun pa niya karon kining gipangayo. (BANAT NEWS)
- Latest
