Mga kapitan moatubang sa kaso ni Pelaez

CEBU, Philippines – Andam moatubang ang mga barangay kapitan sa dakbayan sa Lapu-Lapu sa kaso’ng isang-at sa negosyante’ng si Efrain Pelaez Jr., kinsa molansar sa pagka-mayor sa 2016.

Si Jose Dungog, kapitan sa barangay Gun-ob, ug presidente sa Association of Barangay Councils sa siyudad nga nahinabi sa Banat News niingon nga ang problema sa basura dili dali’ng mawagtang.

"Ang tawo, base sa amo’ng seminar, makahimo og usa ka kilo’ng basura. It is the duty of every individual of the household to clean," tataw ni Dungog.

Niadto’ng Lunes, si Pelaez nipahibawo nga molansar siya sa pagka-mayor ug plano niya nga mopasaka og kaso batok ni Mayor Paz Radaza ug mga kapitan gumikan sa nagpasad nga basura.

Matud ni Dungog nga dili na bag-o kanila ang bahad ni Pelaez.

"That news is not news to us. Wa mi mahadlok kay motubag man sad mi," matud ni Dungog.

Si Dungog niingon nga kada adlaw manuroy ang mga na-assign sa clean and green department alang sa pagpanglimpyo sa mga basura sa kadalanan ilabi na ang mga sudlunon nga mga sityo sa matag barangay.

Aduna sab siya’y gihimo nga resolusyon alang sa clean and green contest sa matag barangay nga adunay koordinasyon sa City Environment and Natural Resources (CENRO).

Nagkanayun si Dungog nga prayoridad sa dakbayan ang pagpanglimpyo sa mga main roads nunot usab sa Asia- Pacific Economic Cooperation (APEC) Summit nga gisalmutan sa mga delegado sa 21 ka member economies. – /GMR) (BANAT NEWS)