Pagkahanaw sa CCMC scrap giimbestigar na
CEBU, Philippines – Nagsugod na ang Ombudsman sa pag-imbestigar sa gireklamo nga pagkahanaw sa daghang scrap nga mga puthaw gikan sa giguba nga building sa Cebu City Medical Center (CCMC).
Ang tigpamaba sa Ombudsman nga si Atty. Maria Corazon Naraja miingon nga nakadawat sila og awhag gikan sa City Council nga ipaimbestigar ang pagkahanaw sa mga scrap nga puthaw.
Ang Commission on Audit mihatag og baruganan nga ang pagguba sa karaang CCMC building gihimo nga wala kaayo mahitsas ang mga gikinahanglang dukomento ug ang mga scrap nga puthaw wala masuta kun asa mahipunta.
Ang karaang CCMC building gipaguba ni Mayor Michael Rama kay ang mga structural engineer miingon nga huyang na ang building tungod sa kusog nga linog kaniadtong Oktubre 15, 2013.
Nahibaw-an sa City Council nga ang mga P1.8 milyones nga scrap metal nga nakuha gikan sa giguba nga ospital tua mahipunta sa JLC, usa ka pribado nga construction company nga mitabang sa pagguba sa CCMC.
Wala bayri sa dakbayan ang JLC mao nga ang mga scrap nga puthaw gihatag ra usab kanila. (BANAT NEWS)
- Latest
