Terorismo kaya sa APEC members

CEBU, Philippines – May kapasidad ang 21 ka member economies sa Asia-Pacific Economic Cooperation Summit (APEC) sa pagpakigbatok sa terorismo.

Kini ang gipahayag ni Assistant Secretary Oscar Valenzuela, chairman sa Counter Terrorism Working Group sa APEC, atol sa duha ka adlaw nga tigum isip kabahin sa 3rd Senior Officials’ Meeting nga gitambungan sa mga delegado.

Matud ni Valenzuela nga gikinahanglan ang pagmugna og mga estratehiya aron dili malutsan sa mga terorista.

Tumong sa tigum sa CTWG ang pagpalambo sa koordinasyon ug kooperasyon sa APEC, pribado’ng sektor ug uban pa’ng organisasyon.

Suportado sa CTWG ang mga programa nga maglig-on sa mga APEC member economies collaboration sa pagpakigbatok sa mga terorista ug aron usab pag-promote sa pagpakigbayloay og impormasyon labot sa mga lihok sa mga terorista’ng grupo.

Matud ni Valenzuela nga sa dili pa matapos ang tuig kinahanglan nga matuman ang tagsa-tagsa ka action plan sa 21 ka member economies.

Giangkon ni Valenzuela nga lisud pakigbatukan ang hulga sa terorismo tungod kay dili makit-an ug dili mailhan ang mga terorista ug sa ka-advance sa mga estratehiya nga ila’ng gigamit karon.

Tungod niini kinahanglan gyud ang pagtinabangay aron mapakgang ang hulga sa terorismo.

Gitataw atol sa tigum nga tinguha gyud nila nga mahatagan og solusyon ang security concerns sa mga patigayun tungod kay daku kini og matabang sa stability ug productivity sa economic relations tali sa mga APEC member economies. Gihimug-atan sa CTWG ang terrorism attacks nga makadaut sa kahapsay sa usa ka lugar sama sa pagpangatake sa mga mass transport system sama sa airport ug airlines nga nahitabo sa ubang nasud. – /GMR) (BANAT NEWS)