Isyu sa scrap sa CCMC ipa-imbestigar
CEBU, Philippines – Giduso sa konseho sa dakbayan sa Sugbo ang fact-finding investigation sa P1.86 milyones nga balor sa scrap metals gikan sa gidemolis nga Cebu City Medical Center sa niagi’ng tuig.
Matud ni Bise Mayor Edgardo Labella nga gisakyan og politika ang isyu ug mas maayo nga ang Ombudsman ang mo-imbestigar.
Una’ng nalambigit si Konsehal Mary Ann de los Santos sa isyu kinsa apil sa CCMC ad hoc committee diha’ng gidemolis ang CCMC nga naguba sa 7.2 magnitude nga linog niadto’ng Oktuber 2013 ug giguba ang hospital niadto’ng Pebrero 2014.
Karong Miyerkules tukion sa konseho ang giduso nga resolusyon ni Konsehal Noel Wenceslao nga mag-awhag sa Ombudsman sa pag-imbestigar sa isyu.
Apan matud ni Konsehal Margarita Osmeña nga nahibulong siya sa lakang nga humana kini naduso sa niagi’ng tuig. Si De los Santos, bag-o lang nitapon sa Bando Osmeña-Pundok Kauswagan gikan sa Team Rama.
Matud ni Osmeña nga ang paghatag og closure sa isyu anaa sa kamot sa Ombudsman ug sa Commission on Audit. Ang COA nikwestiyon na sa demolisyon gumikan kay wala’y husto nga documentation ang scrap materials sa gigubang building.
Sa executive session sa konseho niadto’ng Disyembre 4, 2014 nasayran nga ang JLC Construction ang nakakwarta sa P1.86 milyones sa scrap metals. – /GMR) (BANAT NEWS)
- Latest
