Rally sa INC wa nadayon
CEBU, Philippines – Nagtapok kagahapon sa buntag ang mga sakop sa Iglesia Ni Cristo (INC) sa Central Visayas sa ila’ng simbahan sa General Maxilom Avenue, siyudad sa Sugbo.
Tumong nila ang pagpahigayun og lihok protesta batok sa Department of Justice (DOJ).
Matud sa tigpamaba sa INC Cebu South District, Rommel Pañares, nga nakadawat sila og official statement gikan sa uluhang buhatan nga nagkahinabi na ang INC ug ang gobiyerno ug nagkasinabot na hinungdan nga natapos na kagahapon ang ila’ng malinawon nga lihok-protesta.
Si Pañares niingon nga malipayon ang INC tungod kay nagmadaugon sila sa ila’ng gipakigbatukan nga pagyatak sa pang-gobiyerno ilabi na ni DOJ Secretary Leila de lima sa katungod sa mga sakop sa INC.
‘‘Gihilabtan niya ang kaugalingong problema sa Iglesia, adunay personal nga problema ang Iglesia nanghilabot siya, kung naay problema ang amahan ug anak ideretso ba dayun sa DOJ?’’ asoy ni Pañares.
Gibana-bana nga dili mominus sa 20 mil ka tawo gikan sa Sugbo, Negros ug Bohol ang nitambong unta sa rally nga ipahigayun sa Plaza Independecia. – /GMR) (BANAT NEWS)
- Latest
