CEBU, Philippines - Kapin sa usa ka libo ka punoan sa marijuana ang naibot sa mga sakop sa Regional Public Safety Battalion 7 sa ilang operasyon sa miaging adlaw gikan sa Brgy. Basiao sa lungsod sa Badian.
Sumala pa ni PO1 Edwin Catamco, tigpamaba sa RPSB7 nga ang naibot nga marijuana didto gihapon nila naibot sa plantasyon nga ila usab naronda sa miaging tuig diin 3 mil usab ka punoan ang naibot.
Gibutyag ni Catamco nga ang tropa nga gipangulohan ni Supt. Jonathan Pineda ug ni Senior Insp. Alvino Enguito maoy mironda sa maong plantasyon.
Nagkuha lang sila og sample sa mga naibot nga marijuana ug ang uban ila ning gidauban sa lugar, wa silay naabtang nananom niini sa ilang pag-abot.
Samtang nadakpan sila si Christian Caballero Maglasang, 18, ug ang amigo niini nga si Raymart Gabo Salomag, 18, atol sa implimentasyon sa warrant of arrest sa mga sakop sa Talisay City Police Station diha sa sitio Manangga 2 Brgy. Tabunok, sa Dakbayan sa Talisay niadtong Biyernes.
Si Maglasang maoy dakpunon tungod sa kasong attempted murder subay sa arrest warrant nga giisyu ni Judge Jacinto Fajardo sa RTC Branch 66 sa Talisay City.
Giapil og dakop si Salomag tungod sa nakuha nga duha ka paketeng gidudahang shabu gikan kaniya, samtang nakuhaan usab og duha ka medium packs nga gidudahang shabu si Maglasang.
Samtang usa ka Mark Amodia, 23, ang gidakop sa police checkpoint human kini nakuhaan og lima ka paketeng shabu diha sa Brgy. Bonbon, lungsod sa Sogod.
Matud pa ni Police Officer 2 Raymond Bacorbo nagsakay og motor ang suspek padung na pauli sa Brgy. Logo sa lungsod sa Borbon dihang naagi kini sa checkpoint ug sa pagrekisa nasakpan kining nagdala og drugas.
Niadtong Biyernes sa hapon nadakpan usab sa mga sakop sa Criminal Investigation and Detection Group-7 sila si Ernesto Monterola ug Joniel Ornopia sa pagpangronda nga gihimo diha sa Sitio Hillside, Brgy.Talamban ning dakbayan sa Sugbo.
Ang duha nakuhaan og 35 gramos nga mikantidad og P413 mil ug ang P300 nga buy- bust money ug P400 nga gituohang kinitaan sa ilegal nga negosyo. (BANAT NEWS)