CEBU, Philippines - Gihimo’ng lugar sa satellite registration sa Commission on Elections ang tanang tindahan sa Gaisano Capital Group lukop nasud.
Usa ka memorandum of agreement ang gilagdaan mismo ni Comelec chairman, Atty. Andres Bautista, tumong sa pagtabang sa kompaniya sa “No Bio, No Boto” campaign.
Si Ryan Li, corporate lease marketing head sa Gaisano Capital Group, niasoy nga nationwide ang ila’ng pagbutang og satellite registration diin mas hayahay ug dili hasol ang pagparehistro.
Ang finance manager sa kompanya, Yongson Huan, nibutyag nga ila’ng gikalipay nga katambayayong sila sa Comelec. Si Bautista mapasalamaton usab sa kompanya tungod sa suporta. Samtang gitun-an sa Comelec ang posibilidad nga dunay pipila ka lugar sa Sugbo diin ang botasyon adto ipahigayun sa mga malls.
Niumol og technical working group ang Comelec aron mo-ila sa mga malls nga mahimo’ng magamit ug magbase sila sa rekomendasyon nga ihatag sa mga provincial election supervisors ug election officers. (BANAT NEWS)