CEBU, Philippines - Gi-atras sa Prevention, Restoration, Order, Beautification, Enhancement (PROBE) Team ang gipasaka nga kaso batok sa duha ka manindahay nga giingong nangguba sa side mirror sa sakyanan ug namaak sa ila’ng sakop.
Matud ni Konsehal Alvin Dizon nga atol sa executive session diin nitambong ang kasamtangang pangulo sa PROBE, Wendelle Cenas, nga nasabutan nga isibog ang kaso sa tawhanong rason.
Si Konsehal Nestor Archival ang nitawag sa hepe sa Carbon Police Station diin natanggong ang duha ka manindahay ug gipahibawo kabahin sa pagsibog sa kaso.
Martes sa hapon nahitabo ang komosyon atol sa clearing operation nga niresulta sa pagkapriso sa duha ka manindahay nga sila si Remafe Cuico ug Rosilyn Cuico.
Kini ang nakapaaghat kang Dizon sa pag-awhag sa buhatan sa Ombudsman ug sa Commission on Human Rights sa pag-imbestigar sa mga sakop sa PROBE.
“Kung wala jud sala ang personnel sa PROBE wala sila’y angay kabalak-an,” matud ni Dizon.
Andam hinuon mo atubang ang PROBE kun ipatawag sila kabahin sa reklamo nga ipasaka batok nila. (BANAT NEWS)