Kamatayon sa manag-uyab gisusi kun may foul play
CEBU, Philippines – Hangtod karon wala pa hingpit siradohi sa mga imbestigador sa Homicide Section sa Cebu City Police Office ang kaso sa manag-uyab nga napalgang patay nga gidudahang ang lalaki mipusil sa ulo sa babaye ug pagkahuman nagpusil usab kini sa kaugalingon sud sa ilang lawak sa balay sa lalaki diha sa Sitio Little Dalaguete, Barangay San Nicolas Proper niadtong nakalabay nga adlaw.
Gitug-an ni Senior Officer 4 Alex Dacua sa Banat News ilaha pang paabuton ang resulta sa paraffin test sa duha ilabi na kang Meljohn Niel Olmedo, 28 , kinsa gidudahang maoy nagpusil sa iyang hinigugma nga si Jennyln Avila, 20, ug nagpusil usab sa iyang ulo.
Lakip sa ipaubos sa paraffin test ang ig-agaw ni Olmedo nga 16 anyos nga didto natulog sulod sa lawak sa duha atol sa pagkahitabo.
Apan si Dacua miingon, dunay mga indikasyon nga si Olmedo gyud ang mihimo sa krimen kay igo sa tuo nga bahin sa ulo ang naangkon ni Avila ug sa tuo ‘sab ang igo ni Olmedo. Si Olmedo dili walhon.
Una nang migawas sa imbestigasyon nga nagselos ang lalaki sa babaye kay duna kini laing karelasyon, gani nag-away pa ang duha apan nahusay kini niadtong Domingo.
Apan nagtuo si Dacua nga wala kini hingpit mahilot sa duha maong misangpot sa dugoong hitabo. – /EIM) (BANAT NEWS)
- Latest
