Upat angol sa bangga

CEBU, Philippines – Upat ang nangaangol human duha ka sakyanan sa gobiyerno nga naglakip sa usa ka ambulansiya ang nagkabanggaanay diha sa national highway sa Brgy. San Isidro sa lungsod sa San Fernando sa nakalabay nga kaadlawon. Giila ang mga naangol mao sila si Misael Rosales, 47, drayber sa ambulansiya sa dakbayan sa Carcar ug ang iyang kauban nga nurse nga si Sam Marcillona.

Samtang naangol sab ang drayber sa laing van nga gipanag-iya sa lungsod sa Badian nga si Joel Virtucio, 37, ug ang iyang kauban nga si Dave Anticristo. Matud pa ni Lucille Sarvida, non-uniform personnel sa San Fernando Police nga nahinabi sa Banat News gikan naghatud og pasyente sa dakbayan sa Sugbo ang ambulansiya  ug paingon na unta balik sa dakbayan sa Carcar.

Apan pag-abot sa maong dapit gikatahong nakatagpilaw ang drayber sa ambulansiya ug nisimang sa lane nga gisubay sa van sa Badian hinungdan sa panagbangga. Daling gihatud sa Carcar Provincial Hospital ang upat ka mga biktima nga nakaangkon og mga bun-og sa ilang kalawasan. – /EIM) (BANAT NEWS)