Truck operators nabalaka sa negosyo

CEBU, Philippines – Nabalaka ang mga truck operators sa epekto ngadto sa ila’ng negosyo sa pagpatuman sa truck ban sa dakbayan sa Sugbo tungod sa Asia-Pacific Economic Cooperation (APEC) Summit.

Kini ang gipadayag ni Lito Maderazo, ang pangulo sa APEC Local Organizing Committee, ngadto sa Cebu City Transportation Office human 70 ka truck drivers ang naisyuhan og citation tickets sa kalapasan sa truck ban policy.

Ang sunod-sunod nga pagkasikop sa mga truck drivers nakaingon sa pagkalangan sa delivery sa mga produkto.

Si CCTO executive director, Atty. Rey Gealon, nipasabot sa mga truck operators nga posible sila’ng makaagi sa Sergio Osmeña Avenue sa North Reclamation Area bisan pa man apil kini sa ceremonial route sa APEC.

Ang truck ban nga gimando ni Mayor Michael Rama nagdili sa mga truck drivers sa pag-agi sa ceremonial route sugod sa alas 6 sa buntag hangtud sa alas 10 sa gabii ug ipahamtang kini hangtud sa Septiyembre 5.

Matud ni Gealon nga ang mga truck drivers masikop kasagaran sa Pope John Paul II Avenue ug Juan Luna Avenue, tungod kay kini ang mga agianan nga mas dali sa ila’ng biyahe.

Si Gealon nihangyo sa mga truck operators nga mosabot sa sitwasyon tungod kay ang mao’ng kalihukan molungtad lang sa duha ka semana. – /GMR) (BANAT NEWS)