CEBU, Philippines – Giawhag ni City Hall consultant, Atty. Joey Daluz, ang konseho sa pagpasar sa resolusyon nga giduso ni Konsehal James Anthony Cuenco sa paghatag og gahum kang Mayor Michael Rama sa pagbayad sa utang sa Japan International Cooperation Agency (JICA).
Matud ni Daluz nga usa sa requirements sa pagbayad sa utang sa siyudad ang resolusyon sa konseho.
Gawas sa resolusyon, daghan pa’ng dokumento nga kinahanglanon sa ubang ahensiya.
Gipasabot ni Daluz nga ang resolusyon magpakita sa panagtambayayong sa mayor ug sa konseho aron mabayran ang utang.
Si Rama nimando sa Local Finance Committee sa pagpaspas sa pagkompleto sa dokumento para pagbayad sa utang.
Ang dakbayan sa Sugbo adunay P3 bilyones nga utang sa JICA ug gisugdan og bayad niadtong 2006 apan hangtud karon nagpabilin gihapon sa mao’ng kantidad tungod sa pag-usab-usab sa foreign exchange rate. – /GMR) (BANAT NEWS)