Pnoy, Binay, Roxas, Poe nia sa sugbo

CEBU, Philippines – Muabot sayo karong buntag si President Benigno Aquino III sa Mactan Benito Ebuen Airbase ug isunod dayun ang iya’ng windshield inspection sa mga proyekto sa Mactan Circumferential Road sa dakbayan sa Lapu-Lapu ug Sergio Osmena Avenue sa dakbayan sa Sugbo.

Mismo si Secretary Rogelio Singson sa Department of Public Works and Highways ang mo-briefing sa Presidente sa proyekto ug mosunod ang iya’ng mensahe.

Ala-una karong hapon mosunod ang iya’ng “Gathering of Friends” nga mga sakop sa Liberal Party sa Kabisay-an sa Cebu Coliseum kauban si Secretary Mar Roxas II sa Department of Interior and Local Government.

Mobiya si Aquino wala pa’y alas kwatro karong hapon.

Gawas kang Aquino ug kaubanan, muabot  usab sa Sugbo karong adlawa si Senador Grace Poe isip pinasidunggan nga dinapit sa University of San Carlos-Main Campus alang sa pagbukas sa intramurals.

Matud ni Mimi Gonzales, media liaison ni Poe, nga igo ra mohatag og mensahe ang senador sa kalihukan ug human niini makighimamat siya sa pipila ka mga higala dayun balik sa kauluhan alang sa sesyon sa Senado.

Samtang dul-an sa 20 ka grupo sa mga mamumuo ang mosugat og protesta kang Aquino.

Matud pa ni Teody Navea sa BM-Sanlakas nga kang Aquino nila ipaabot ang ila’ng mensahe para sa hustisya sa tanang trabahante nga giyatakan sa ila’ng katungod.

Apan si Atty. Rey Gealon, pangulo sa Cebu City Transportation Office, nibutyag nga mangita gyud sila og permit sa grupo nga mag-rally.

Dugang ni Gealon nga wala’y gitugutan nga makaali sa kadalanan aron hamugaway ang pagsulod gawas sa mga delegado sa APEC Summit.

Samtang nakigtagbo si Bise Presidente Jejomar Binay sa mga Sugboanong magpapatigayun labot sa problema sama sa kahuot sa trapiko ug uban pa sa iya’ng pagbisita sa Sugbo kagahapon.

Kini tungod kay nakita niya nga wala kaayo masuportahi ug wala mapundohi sa nasudnong kagamhanan ang dakbayan sa Sugbo.

Dungan nga gipahibawo ni Binay ang pagpangita sa iya’ng partido sa United Nationalist Alliance og standard bearer sa Sugbo.

Usa niini si kanhi bokal Winston Garcia sa pagka-gobernador ubos sa iya’ng partido.

Si Binay niadto sa barangay Luz alang sa usa ka boodle fight kuyog ang mga opisyal ug katawhan sa barangay ug pipila ka mga kapitan sa dakbayan sa Sugbo.

Human sa kalihukan nipahuway una sa makadiyot si Binay ug gisunod niya pag-adto ang barangay Kamputhaw, Calamba , Labangon, Alaska Mambaling, Duljo Fatima, Sawang Calero ug gitapos niya sa usa ka Santos nga Misa sa Basilica Minore del Santo Niño.

Si Binay nia pa karong adlawa sa dakbayan sa Sugbo alang sa pagpakighimamat kang Mayor Michael Rama ug mga opisyal sa dakbayan. – /GMR) (BANAT NEWS)