Drayber sa traysikol gipusil patay

CEBU, Philippines – Patay ang usa ka 56-anyos nga drayber og traysikol samtang nagmaneho kini sa iyang traysikol human gipusil sa wala ilhing lalaki diha sa D. Macapagal Highway sa Brgy. Poblacion, dakbayan sa Toledo kagahapon alas-11:35 sa buntag.

Giila ang biktima nga si Engracio Calvario Canulibang,  56, taga dakbayan sa Talisay apan kasamtangang nagpuyo sa Brgy. Butong sa lungsod sa Pinamungajan.

Sa gihimong imbestigasyon sa kapulisan sa Toledo nasayran nga naghatod sa iyang duha ka pasahero ang biktima apan human nakanaog sa maong lugar ang iyang pasahero kalit nga niabot ang mamumuno dayong pusil sa makaduha ka higayon  sa biktima gamit ang wala matinong kalibre sa armas.

Nakaangkon og samad pinusilan ang biktima sa iyang tuo nga dunggan ug sa likod nga nilapos sa dughan.

Ang mamumuno nagsul-ob og puti nga kolor sa sinina, naka-bonnet  ug shades sakay ang motorsiklo nga adunay puti ug itom nga kolor ug dali nga misibat palayo sa maong lugar.

Gidala ang biktima sa Toledo City Hospital apan gideklarar kini sa nag-atiman nga doktor nga wala nay kinabuhi.

Padayon pang giimbestigahan sa kapulisan ang maong panghitabo alang sa pag-ila sa mamumuno ug sa pagsuta sa motibo sa maong pagpamusil. – /EIM) (BANAT NEWS)