CEBU, Philippines - Laing giugmad nga proyekto sa parking ang gipahunong sa Department of Labor and Employment.
Ang parking lot sa Grand Convention Center sa Archbishop Reyes Avenue giingong wala’y Personal Protective Equipment sama sa full body harness, hardhats ug safety shoes ang mga trabahante.
Kini kalapasan sa PPE matud sa pakisusi ni Labor Laws Compliance Officer (LLCO) Engineer Primo Guarin.
Nasuta nga pareho nga ang Grand Convention Center ug HI-Speed Construction Incorporated, ang general contractor niini, ang wala’y safety officer ug full-time first-aider nga nag-duty.
Wala usab sila makapresentar og third party inspection sa duha ka heavy equipment nga gigamit.
Gawas niini, wala usab sila’y Philippine Contractors Accreditation Board (PCAB) registration ug TESDA certification sa ila’ng mga trabahante. (Decemay P. Padilla/GMR)(BANAT NEWS)