Manipis wa paagii

CEBU, Philippines - Wala’y mga tawo ug mga sakyanan nga gipaagi  kagahapon sa sitio Proper Manguyon, Manipis, dakbayan sa Talisay gumikan sa pagdahili sa yuta ug bato.

Apan matud ni Kapitan Emma Cabiluna nga dunay mga tawo nga dili gyud magpapugong ug moagi gyud bisan nakakita na sa kapeligro.

Paninguha sa kontraktor sa pagpalapad sa dalan nga makuha ang bato aron mahunong ang pagsige og pangatagak sa bato ug yuta gikan sa ibabaw nga bahin.

Gihimo ang alternatibo nga kaagian sa mga tawo pinaagi sa pagbutang og pisi aron adto makalusad sa sapa bisan lisud apan luwas nga makatabok sa pikas dalan.

Si Cabiluna nipadayag nga nagsugod pagdahili ang mga bato ug yuta diha’ng gisugdan sa QM Builders ang pagpalapad sa dalan nga proyekto sa Department of Public Works and Highway.

Samtang si Konsehal Danilo Caballero kinsa niadto sa lugar nikompirmar nga mas grabe kadaghan sa mga dagku’ng bato ang nangdahili hinungdan nga ila gyud gipasirad-an ang dalan.

Ila’ng giawhag ang mga motorista nga adto moagi sa Naga-Uling Road.

Giawhag usab ni Caballero ang kontraktor nga hatagan og pagtagad ang problema aron dili maapektuhan ang mga moagi sa dalan. Padayun hinuon ang clearing operation sa mga trabahante sa QM Builders. (BANAT NEWS)