CEBU, Philippines - Gihawanan na sa Prevention, Restoration, Order Beautification Enhancement (PROBE) Team ang mga stalls sa Barangay Lorega San Miguel Satellite Public Market.
Kini kabahin sa plano nga pagbalik sa nagsangang dalan sa M.J Cuenco Avenue ug New Imus Road.
Si kanhi barangay kapitan Marciano Ando sa Lorega nagkanayon dugay nang gikasabotan tali sa ilang asosasyon ug sa market sa siyudad nga hawanan ang lugar.
Silang 28 ka sakop sa asosasyon boluntaryong miguba sa ilang mga tindahan kagahapong adlawa.
Sa pag-adto sa PROBE lima ka manindahay ang nagmagahi nga mobiya sa ilang lugar, base sa nakuhang impormasyon sa Banat News nga kining nagmagahi dili miyembro sa asosasyon.
Usa kanila nga si Lourdes Reyes mipasangil nga ang tanan nga nahatagan og pwesto sa New Lorega San Miguel Satellite Public Market kasagaran taga Brgy Carreta, samtang silang taga Brgy. Tejero wala hatagi og kabalhinan.
Si Mayor Michael Rama gustong paninduton ang maong dapit ug nakita usab niya nga peligro g’yud sa mga naninda ug sa mga pumapalit nga maharos og sakyanan ang lugar kay kini naa taliwala sa duha ka dalan.
Gibutyag usab ni OIC Market Administrator head Arnel Quijano nga dili tanang nag-okupar sa maong merkado mga negosyante kay gihimo kining katulganan hasta sa mga libudsuroy.
Sugod pa niadtong niagi nga adlaw gisugdan na ang pagbalhin sa mga manindahay sa bag-ong merkado nga nahimutang sa Lorega nga adunay 40 ka stalls. (BANAT NEWS)