CEBU, Philippines – Mainitong gihangop sa mga Sugbuanon ang Run Duterte Run, usa ka caravan palibot sa probinsiya sa Sugbo, sa pag-awhag kang Davao City Mayor Rodrigo Duterte sa pagdagan pagka-presidente sa 2016.
Kini ang gipadayag ni Atty. Noel Felongco, ang presidente sa National Executive Committee Council sa Mayor Rudy Roa Duterte (MRRD) for 2016 President Movement human sa ilang caravan sukad niadto’ng Sabado nga matapos karong adlawa.
Ang kalihukan dungan nga gihimo sa kauluhan ug sa Mindanao.
“Very warm ang reception sa mga Cebuanos sa prospect nga modagan si Mayor Duterte. Nangutana sila modagan na ba gyud,” padayag ni Felongco.
Gipahibawo ni Felongco nga 46 ka sakyanan ang ila’ng gibahin sa lainlaing grupo nga nilibot sa kalungsuran ug mga dakbayan sa probinsiya sa Sugbo. Ang grupo nihimo usab og courtesy call sa mga mayor ug bise mayor aron pagpasabot sa ilang kalihukan. Ang mga lider magtagbo sa Davao karong Agosto 28.
Malaumon si Felongco nga modeklarar na si Duterte sa iya’ng pagdagan sa tunga-tungang bahin sunod buwan. (BANAT NEWS)