QRF sa Kapitolyo P3.9M na lang
CEBU, Philippines – Aduna na la’y P3.9 milyones ang nahabiling pundo sa kagamhanan sa probinsiya sa Sugbo alang sa Quick Response Fund (QRF) nga magamit sa hinabang sa mga biktima sa katalagman.
Si Danilo Rodas, provincial budget officer, nibutyag nga sa tibuok tuig dunay P36 milyones ang gigahin nga budget alang sa QRF.
Kini nagamit sa hinabang sa biktima sa bagyo’ng Seniang ug sa El Niño sama sa pagpamalit og school supplies sa mga anak sa naapektuhan sa katalagman ug pagpamalit og mga baril nga pundohanan og tubig sa mga mag-uuma atol sa huwaw.
Matud ni Rodas nga ang probinsiya adunay P121 milyones nga budget alang sa Disaster Risk Reduction Management (DRRM) Fund.
Ang P85 milyones alang sa disaster prevention, mitigation, preparedness, rehabilitation ug recovery efforts may nahabilin pa nga P37 milyones.
Sa laing bahin, si Baltazar Tribunalo, pangulo sa PDRRMO, nagkanayun nga i-maximize nila ang pundo nga gigahin.
Matud niya nga ang mga lungsod adunay pundo sa ila’ng DRRM nga pwede’ng magamit sa emerhensiya lakip na sa kabarangayan.
Ang PDRRMO naglaum usab nga ang nasudnong kagamhanan mohatag og tabang kung grabe ang maigo nga katalagman sa lugar. – /GMR) (BANAT NEWS)
- Latest
