Busay Gym peligrong matabunan
CEBU, Philippines – Walay klaseng nahitabo kagahapon sa hapon sa Busay Elementary School nga anha gihimo sa ilang temporaryong tunghaan diha sa Busay Sports Complex human nimando si Mayor Michael Rama gumikan sa pagdahili sa pipila ka bahin sa yuta duol sa maong gymnasium.
Kini ang gipahibalo ni Konsehal Eleudoro “Yody” Sanchez sa Brgy. Busay nga nahinabi sa Banat News.
Matud pa ni Sanchez, gumikan sa sagunson nga pag-ulan nabantayan kagahapon sa buntag nga adunay pagdahili sa yuta.
Nagpatabang dayon siya sa mga opisyal sa dakbayan ug sa city disaster lakip sa school board tungod kay dili na makaya sa ilang kahimanan ug kapabilidad ang maong peligro.
Sumala pa ni Sanchez, gusto niyang mahatagan og medyos ang maong problema kay magpaabot pa ba diay sila og dunay maapektahan sa maong problema.
Si Dr. Theron Aranas sa iyang bahin sa DepEd Cebu City Division Disaster Management Council, nisusi sa maong lugar ug nipahigayon og tigom kauban si Konsehal Dave Tumulak aron tukion ang paghatag og sulbad sa maong problema.
Tungod sa kapeligro nga mahunlak ang retaining wall duol sa maong tunghaan dili una paklasehan ang maong gymnasium nga dunay 563 ka tinun-an.
Sa pagkakaron, anha una sila magklase pagbalik sa karaan nilang tunghaan sa ubos nga bahin sa maong gymnasium. – /EIM) (BANAT NEWS)
- Latest
