Nibaligya sa biskwit gustong kasohan

CEBU, Philippines – Mibaligya sa mga repacked biscuits nga nakapatay sa usa ka 2-anyos nga batang babaye gipanawagan sa mga ginikanan sa mga biktima nga mopatim-aw sa kapolisan aron manubag sa iyang nahimo ngadto kanila.

Kagahapong adlawa, gilubong na sa kapahulayang dayon ang namatay nga si Carl Jed Talingting sa Lapu-Lapu City Catholic Cemetery sa Humay-Humay, Gun-ob sa maong dakbayan.

Ang gipanawagan sa mga ginikanan ni Talingting ug sa inahan sa laing nahilo nga bata mao si Marichu Abucay, kinsa maoy gikatahong  nagnegosyo pagpamaligya og repacked nga biskwit.

Giawhag nila kini nga makigkita kanila ug makig-alayon sa Lapu-Lapu City Government ug Department of Health.

Si Gretchen Jugan, kansang anak apil sa nahilo ug maoy nakapalit sa maong biskwit gikan kang Abucay ug mao usab ang nanghatag niini sa uban pang mga nangahilo apil ang namatay nga si Talingting,   mihatud sa lubong sa bata.

Ang amahan ni Carl nga si Charlie, 34 anyos, nagkanayon nga mahimong ma "settle" ang nahitabong insidente apan kung di mahimo ilang pasakaan og kaso si Abucay.

Gawas ni Carl, ang  laing bata nga nangalanag ug gidala sa tambalanan mao ang mga igsuon niini nga si Claralyn, 4; Chloe, 3; Clarence,6; anak ni Jugan nga si Jaden Liam, ug ang tiguwang nga silingan nga si Andres Sabidor.

Duha ka putos nga gi-repacked nga biskwit ang napalit ni Jugan gikan ni Abucay sa milabay’ng Martes. Si Abucay, gikatahong nagpuyo sa usa ka boarding house sa Barangay Pusok ug namaligya sa repacked nga biskwit gikan sa usa ka biscuit factory sa dakbayan sa Mandaue.

Nasayran ‘sab nga gisaw-an sa mga bata ang usa ka platong biskwit ug strawberry-flavored nga wafers ug ni Sabidor apan human niini nagsukasuka silang mga nakakaon.

Apan naluwas ang mga biktima gawas lang ni Carl nga namatay sa Vicente Sotto Memorial Medical Center sa miaging Huwebes sa gabii.

Base sa findings sa VSMMC, gikatahong si Carl namatay tungod sa "septic shock caused by acute gastroenteritis with severe dehydration."

Apan matud sa imbestigasyon ni Dr. Rodolfo Berame sa City Health Office, posibleng aduna pay laing gikaon ang bata (Carl) gawas sa biscuit nga posibleng nakasamot sa iyahang kundisyon nga miresulta sa iyahang kamatayon. – /EIM) (BANAT NEWS)