CEBU, Philippines – Patay na nga nadangat sa tambalanan ang usa ka 66 anyos nga lalaki human natagak sa pangpang ang iyang gisakyang multicab diha sa Pacific Heights, Brgy. Candulawan sa dakbayan sa Talisay pasado alas-7 kagahapon sa buntag.
Ang biktima mao si Cesar Manzano, taga Sta. Lucia, Vista Grande, Brgy. Bulacao sa maong dakbayan.
Matud pa ni Police Officer 1 Janel Figura sa Talisay Police nga nahinabi sa Banat News kini miingon gikan sa Tabunok ang biktima ug paingon na unta mopauli agi sa maong dapit.
Sigun pa sa mga nakakita sa hitabo, nagsubida ang sakyanan sa biktima dihang kalit lang kini miatras ug hangtod nahulog sa lawom nga pangpang.
Sumala pa ni Figura posibleng nagkaaberya ang makina ang hinungdan sa pag-atras sa sakyanan ug posible ‘sab nga giatake sa sakit ang biktima hinungdan nga nawad-an kini og kontrol sa sakyanan hangtod miatras paingon sa pangpang.
Gumikan sa kalawom ug kalisod sa nahulogan sa sakyanan dugay nga naugkat sa mga rescuers ang lawas sa biktima nga naipit sulod sa sakyanan.
Daghang bun-og sa lawas ilabina sa ulo ang naangkon ni Manzano nga sulay pa untang gidala sa Talisay City District Hospital apan gideklara nga dead on arrival sa nag-atiman nga doktor. – /EIM) (BANAT NEWS)