Mitunol og nubain ‘sakpan
CEBU, Philippines - Usa ka lalaki nga miduaw sa prisohan ang napriso usab human kini nasakpan nga mitunol og syringe nga aduna’y gidudahang “nubain” ngadto sa usa ka piniriso sa Pardo Police Station niadtong milabay’ng gabii. Si Ben Johnson Padica, 23, taga Brgy. Pardo, Cebu City, ang napriso na karon uban ang iyang amigo nga iyang gibisita nga si Elmer John Cabaltera, 21, nga nadakpan sa illegal possession of firearms.
Matud ni Senior Police Officer 4 Rene Baral , desk officer sa Pardo Police Station, alas-11 sa gabii niadtong Biyernes sa gabii kalit nga misulod si Padica sa ilang opisina ug niduol sa prisohan.
Tungod kay dili na pwede ang mga bisita nianang mga orasa, giduol ug gibadlong ni Police Officer 2 Renante Bargayo si Padica ug naabtan niyang padung kini motunol sa usa ka syringe nga aduna’y sulod nga likido nga gidudahang nubain ngadto kang Cabaltera.
Sigon ni Baral, si Padica miangkon nga nubain kadto ug iya unta nga ihatag sa iyang amigo nga gisugo kaniya niini.
Si Padica napriso karon sa Pardo Police Station ug mag-atubang og kaso nga possession of illegal drugs ug possession of illegal drug paraphernalia. (BANAT NEWS)
- Latest
