Barko nasunog, mga pasahero luwas

CEBU, Philippines - Barko nga gikan  pa sa Sugbo nga padung sa Ormoc City nasunog diha sa pantalan sa maong siyudad, duha ka tripulante ang nangaangol.

Ang nasunog mao ang MV Wonderful Stars nga iya sa Roble Shipping Lines adunay 544 ka pasahero nga luwas hinuon nga nakakanaog sa maong barko.

Apan duha sa ilang mga tripulante nga sila si Jake Rondell Guinocor ug Daryll Lee Bentoy ang nakaangkon og mga ginagmay nga paso ug nalandig karon sa Ormoc Sugar Planters’ Association—Farmers Medical Center.

Sumala pa ni Police Regional Office-8 Director, Chief Superintendent Asher Dolina , sa 544 nga sakay niini 30 ang mga bata ug 39 ang tripulante.

Si Teodoro Franco Omega, kinsa maoy gitudlong representante sa Roble Shipping management didto sa Ormoc City miingon nga naglisod g’yud ang mga bombero pag-atraka sa sunog tungod sa itom kaayong aso gikan sa nangasunog nga sakyanan.

Lakip sa mitabang sa BFP-Ormoc mao ang mga bombero sa Baybay City, mga lungsod sa Albuera, Kananga ug Isabel.

Ang Roble Shipping gipaabot pa nga moduso sa ilang “marine protest” sa Coast Guard-Ormoc Station.  Nagpasalamat hinuon ang tagdumala sa Roble Shipping nga way nakalas ug ang barko ug kargamento lamang ang nawala.

 “That is what is important. The ship is just property. We cannot put a value on the lives of people,” matud pa ni Omega. Nigikan sa Sugbo ang barko alas-10:30 sa gabii niadtong Biyernes ug niabot sa Ormoc alas-3:50 sa kaadlawon kagahapon(Sabado).

Matud pa ni Captain William Isaga, District Commander  sa Coast Guard District Eastern Visayas nga nasunog og apil ang tanang kargamento sa maong roll-on/roll-off nga barko. Gipasabot hinuon niya nga P65 milyones ang insurance sa barko.

Giandam sa coast guard ang oil spill boom kun moawas ang  krudo gikan sa nasunog nga barko.

Si Jose Emery "Joy" Roble, usa sa mga nagrepresentar sa kompanya sa maong barko miingon nga padayon pa nila karong giimbestigar kung unsay hinungdan sa pagkasunog sa ilang barko ug bukas usab sila sa imbestigasyon nga buhaton sa Marina ug coast guard.

Ang maong barko nakatabang na sa daghang mga relief operations sa Guinsaugon, Yolanda ug sa paghatod sa mga biktima sa nalunod nga usa ka pasaheroan diha gihapon sa Ormoc  City sa niaging buwan ngadto sa Camotes.  (BANAT NEWS)