CEBU, Philippines - Gipaubos og subsob nga Disaster Risk Reduction Training ang mga tinun-an sa dakbayan sa Talisay sa mga sakop sa Local Disaster Risk Reduction and Management Office (LDRRMO).
Kini isip pagpangandam sa mga estudyante sa panahon adunay motumaw nga kalamidad , ilabi na kun sila anaa sa eskuylahan.
Ang gibalik nga bag-ong pangulo sa LDRRMO sa Talisay Vince Monterde, nipahibaw nga tulo ka adlaw ang ilang gigahin alang sa mga estudyante mopaubos sa training seminar gikan sa nagkadaiyang tulonghaan sa Talisay diin ang matag eskuylahan maoy mopadala sa ilang mga representante .
Matud ni Monterde nga importante kaayong mabansay ang maong mga tinun-an aron mahibaw kini sila kung unsay mga buhaton pagtubag sa emerhensya, ug malikayan ang pagtumaw sa mga casualties. Sa maong training seminar tudloan ang mga tinun-an sa first aid, ug uban pang gikinahanglang makat-unan.
Matud ni Monterde, gihimo nila kini tungod kay daghan silang nakitang sayop nga gihimo ang mga tinun-an atol sa gihimong kinalit nga earthquake drill pipila ka semana na ang nilabay.
Ang maong training gigahinan og P2 milyones nga pundo gikan sa Local Disaster Fund sa siyudad.(Renan Alangilan/EIM)(BANAT NEWS)