CEBU, Philippines - Nibalhin sa pagparehistro si kanhi kongresista Pablo John “PJ” Garcia gikan sa lungsod sa Barili sa ikatulong distrito ngadto na sa lungsod sa Dumanjug nga mahisakop na sa ikapito’ng distrito.
Giubanan sa mga kapitan sa kabarangay sa lungsod sa Barili ug Dumanjug si Garcia sa buhatan sa Commission on Elections kagahapon.
Matud ni Garcia nga sa nilabay’ng tuig nibalhin na siya pagpuyo sa Bitoon, Dumanjug gumikan sa pagpanggukod nga gihimo sa administrasyon ngadto sa iya’ng igsuon nga si Mayor Nelson Garcia.
“Sakit kaayo ug wa na ko kauyon sa ila’ng gibuhat nga paggukod sa akong igsuon. Ila kana’ng gibuhat tungod tingale kay si Nelson ra ang naa diri nga distrito,” matud ni PJ.
Nunot niini matud ni PJ nga mahimo siya’ng modagan sa pagka-mayor sa Dumanjug, bokal o kongresista sa ikapito’ng distrito.
Ang laing igsuon nga si kanhi bokal, Atty. Winston Garcia, kinsa gihugunhugunan nga modagan sa pagka-gobernador, niingon nga ang pagbalhin ni PJ kabahin sa lakang sa One Cebu Party sa pagpangandam sa sunod eleksiyon. (BANAT NEWS)