Nag-milk shake nadakpan sa CIDG-7
CEBU, Philippines - Lima ka mga tawo ang nadakpan sa Criminal Investigation and Detection Group-7 nga naglakip sa usa ka 40 anyos nga lalaki nga gidudahang notadong tigbaligya og milk shake diha sa Miñoza Street, Brgy. Talamban ning dakbayan sa Sugbo niadtong nakalabay nga hapon.
Ang balay sa suspek gibanabana lang nga 40 metros ang gilay-on gikan sa Talamban Police Station.
Ang mga nadakpan naila mao sila si Ian Dexter Tancinco, nga mao’y target sa kapulisan ug ang laing upat nga sila si Richie Ong, 38, nga taga barangay Pit-os, Joseph Lopez, 35, taga dakbayan sa Mandaue, France Ceniza, 20, ug Jesus Tancinco, 43.
Matud pa ni Superintendent Fermin Armendarez III ang deputy chief sa CIDG-7 dunay nakatug-an kanila nga namaligya og milk shake ang suspek sa maong lugar. Ang milk shake mao ang gisagol nga nubain ug shabu.
Sumala pa ni Armendarez nga ang suspetsado kaya nga makabaligya ug 200 ka mga milk shake kada semana sa presyo nga P200 matag ampoule.
Nasakmit sa CIDG ang 16 ka milkshake ampoules ug laing 16 ka basiyo niini, samtang nakuhaan sab og mga gagmay nga pakete sa gituohang shabu ang upat niya ka kauban.
Sigun pa ni Armendarez, maglisod ang kapulisan sa Talamban pagronda sa suspetsado kay nakaila si Tancinco si kinsa ang mga polis sa maong buhatan. (BANAT NEWS)
- Latest
