CEBU, Philippines - Nasikop ang notado’ng pusher ug iya’ng sinaligan sa buy-bust operation sa Regional Anti-Illegal Drug Special Operations Task Group-7 sa Purok 6, San Miguel, Apas, dakbayan sa Sugbo pasado alas 2 sa niagi’ng kadlawon.
Si Octavio Cabucos Jr., 38, gidudahang level 2 drug pusher ang nadakpan human nitunol sa usa ka pakete sa gituohang shabu sa asset sa kapolisan bugti sa P500 nga buy-bust money.
Lakip sa nadakpan si Renato Ochea, 45, sinaligan nga tawo ni Cabucos. Matud ni Senior Insp. Noel Bicoy, team leader sa RAIDSOTG-7, nga sagad sa kostumer ni Cabucos mga call center agents.
Atol sa operasyon nakit-an sa kapolisan si Ochea sulod sa balay sa suspek hinungdan nga girekisa ug nakuhaan og duha ka medium-sized sa gituohang shabu nga kantidad og P200,000.
Laing putos nga nakit-an sa kapolisan nga may sulod duha ka medium-sized sa drugas ug kwarta nga P700. Nasuta usab sa kapolisan nga may kubol-kubol nga gihimo ang suspek diin may improvised nga signaling device nga hiniktan nga lata sama sa kinaraan nga paagi sa telepono.
Giingong abot sa lungsod sa Consolacion ang negosyo ni Cabucos. (BANAT NEWS)