CEBU, Philippines – Usa ka drayber sa taksi ang gipasakaan og kasong carnapping human wala iuli ang taxi unit nga iyang gimaneho ngadto sa iyang agalon.
Si Associate Prosecution Attorney II Sarah Vanessa Lacno nakakita og basehanan aron isang-at ang kaso batok kang Lyndon Catubig, 28, taga Sitio Englis-Riverside, V. Rama, Guadalupe, Cebu City.
Ang suspek gipadad-an og summon aron patubagon kabahin sa reklamong gipasaka sa RP Corominas Transit Inc. batok kaniya.
Apan matud pa ni Lacno wala motubag ang suspek human sa pipila ka adlaw nga gihatag nga tagal kaniya hinungdan nga giduso ang kaso ngadto sa korte ug girekomendar ang pagdakop kaniya ug temporary lang kining makagawas kun makabutang og P180,000 nga piyansa.
Si Lucita Lumongsod, 45, kahera sa RP Corominas Transit Inc., nagkanayon nga sukad niadtong Pebrero 28, 2015 hangtud Marso 2, 2015 wala mo-report ang akusado sa ilang opisina.
Niadtong Marso 5, 2015, midangop si Lumongsod sa Theft and Robbery Section sa Cebu City Police Office bahin sa pagkahanaw sa ilang taksi.
Si Lumongsod nagkanayon nga ang wala pag-uli sa taxicab , timailhan nga gi- carnap sa akusado ang iyang giabangan nga taxi unit. – /EIM) (BANAT NEWS)