CEBU, Philippines – Giatake og mga peste nga “army worms” ang mga umahan sa pipila ka mga lungsod sa rehiyon gumikan sa taas nga panahon sa huwaw sumala pa sa Department of Agriculture-7.
Si Bienvenidk Acabal Jr., Agriculture Chief III sa Regional Crop Protection Center sa DA-7 miingon, lakip ang mga lungsod sa Medellin, Ginatilan, Oslob ug Bogo City sa probinsiya sa Sugbo ang apektado.
Hinuon mao pa kini ang labing unang higayon nga giatake ang maong mga lugar sa mga peste.
Samtang apektado usab ang Isla sa Bantayan, DaanBantayan ug pipila ka lugar sa Negros Oriental ug Bohol.
Dugang ni Acabal ang army worms kon mga ulod sa mais ang sagad nga nakaperwisyo sa mag-uuma tungod sa grabeng kainit.
Base sa uwahing datos sa DA-7 adunay 5,041.53 ka ektaryang kamaisan ang ilang gibantayan sa buwan sa Hulyo, ug ilang namatikdan nga 56.3 ektarya niini ang giatake sa maong mga ulod.
Sagad sa maong mga umahan didto nahimutang sa Negros Oriental.
Usa sa lakang nga gibuhat sa mga mag-uuma, lokal nga kagamhanan ug sa DA 7 mao ang pagbomba og kemikal o pesticides sa mga tanom aron mapakgang ang pagdaghan sa maong mga ulod.
Ang DA-7 adunay budget nga P500,000 alang sa libreng insecticide, herbicide, ug pesticide nga gipanghatag ngadto sa nagkadaiyang kaumahan.
Giklaro hinuon ni Acabal dili pa alarming ang maong panghitabo.
Gibantayan usab nila karon kining duha ka hotspot areas sa rehiyon nga dunay grabeng problema sa locust o dulon diin mao usab kini ang grabe nga makadaot sa pananom.
Ang Pamplona sa Negros Oriental ug Hilantagaan, Sta. Fe sa isla sa Bantayan aduna'y kasaysayan sa dulon.
Matud ni Acabal niadto pang 1998 uwahing dunay natalang pag-atake sa mga dulon sa maong mga lugar.
Si Acabal nagkanayon, grabe ang kadaot nga ibilin sa dulon kun kini ang moatake sa kaumahan tungod kay sud lang sa usa ka gabii mahimo nilang hutdon ang usa ka ektaryang katubhan depende sa ilang gidaghanon.
Gawas sa maong mga insekto, usa usab sa problema ang populasyon sa mga ilaga sa kaumahan nga mao'y kontra sa mga mag-uuma tungod kay pangaunon niini ang bunga sa mga tanom. – /EIM) (BANAT NEWS)