CEBU, Philippines – Makigtagbo si Gobernador Hilario Davide III sa mga sakop sa Hotel Resort and Restaurant Association in Cebu (HRRAC) labot sa giingong pagpaburot sa room rate atol sa Asia-Pacific Economic Cooperation (APEC) Meeting.
Matud ni Davide nga hangyuon niya ang HRRAC nga paubsan ang room rate sa mga accredited hotels sa APEC.
Nagtuo si Davide nga dili alkansi ang mga hotels sanglit ang APEC Meeting molungtad pa sa Oktubre.
Nakasabot si Davide sa mga tagdumala sa hotels sanglit ila kini’ng negosyo.
Sagad himuon sa mga hotels ang pagpasaka sa presyo panahon sa peak season hangtud sa syento porsyento ilabi na nga ang mga Koreans, Chinese ug Japanese moabot sa Sugbo matag buwan sa Agosto.
Si Undersecretary Laura del Rosario, chairperson sa APEC 2015 Senior Officials’ Meeting, ang una’ng nibutyag nga nakadawat sila og reklamo gikan sa mga delegado sa APEC sa grabe’ng kamahal sa hotel sa Sugbo atol sa ila’ng kalihukan. – /GMR) (BANAT NEWS)