Gikarnap narekober sa ginukdanay

CEBU, Philippines – Human sa ginukdanay kagahapon sa buntag, narekober sa kapolisan ang usa ka van nga gikarnap niadto’ng nakalabay nga buwan.

Si Jeoffrey Noel, 40, taga Urgello, Sambag II, ang positibo’ng niila sa iya’ng Suzuki multicab van nga dunay plaka nga JDS 447 bisan og gipintalan na og lain.

Sumala pa ni Noel nga niadtong Hulyo 9 nawala ang sakyanan samtang giparada sa gawas sa ila’ng balay.

Kagahapon sa alas 11 sa buntag samtang nagkuha og kwarta sa bangko sa may dalan Escario si Noel, iya’ng nasigpatan ang sakyanan.

Kauban ni Noel ang iya’ng higala, ila’ng gisundan ang sakyanan ug dali nga nitawag sa Mobile Patrol Group (MPG) sa 166.

Si Police Officer 1 Dennis Estrada sa Guadalupe Police Station niingon nga ila’ng nadawat ang alarma gikan sa MPG alas 11:30 sa buntag.

Ang van gimaneho ni Fernando Pangatungan, 40, nga taga A. Lopez, Calamba ug sakay ang kapuyong  si Jennifer Escopete ug higala nga si Lorito Nabua, 43, taga V. Rama, Calamba.

Human nasigpati sa mga polis ang sakyanan nagginukdanay kini gikan sa dalan Andres Abellana paingon sa dalan Modesta sa Guadalupe nga nisulod sa sudlunon nga bahin sa dalan Quijada ug nihunong duol sa usa ka apartment.

Si Estrada niingon nga si Pangatungan dali nga nisaka sa ikatulo nga andana sa Montesclaros Apartment ug nilayat sa likod ug nakasibat.

Nasikop sila si Escopete ug Nabua nga pulos nagkugos og gagmay nga bata nga kaluha nga anak ni Escopete sulod sa van. – /GMR) (BANAT NEWS)