Tulo gipamusil, 1 patay
CEBU, Philippines – Tulo ka mga giingong sakop sa Alpha Kappa Rho fraternity ang gipamusil, usa kanila ang patay samtang talandugon ang kahimtang sa duha nila ka mga kauban human sila girapido sa duha ka wala mailhing lalaking nagmotor diha sa Sitio Bajac, Brgy. Poblacion sa lungsod sa Liloan sa miaging Lunes sa gabii.
Si Senior Police Officer 4 Octavio dela Paz sa Liloan Police Station miila sa namatay nga mao si Jay Malagar Misa, 34, nagpuyo sa maong dapit samtang ang nangaangol mao sila si Clyde Malagar, 23, ug Jonathan Colambao, 19.
Matud pa ni Dela Paz nga ang tulo gikan pa nagbilar sa namatay nilang higala.
Nasuta usab nga usa sa mga biktima ang gikatahong amigo sa gi-ambush patay nga si Ronie Mariquit sa nakalabay nga semana.
Apan wala maestablisar sa kapolisan kun duna bay koneksyon ang pagpamusil niadtong Lunes sa kamatayon ni Mariquit.
Matud pa nga samtang naglakaw ang tulo sa maong dapit kalit lang mitumaw ang usa ka motorsiklo nga giluwanan sa duha ka wala hiilhing mga lalaki nga pulos nagsuot og helmet ug gipamusil ang mga biktima.
Human sa maong pagpamusil dali nga mipabulhot ang duha ka wala hiilhing lalaki palayo sa lugar. Daling gidala ang mga biktima sa Liloan Medical Center apan patay na si Misa ug gibalhin og tambalanan sa dakbayan sa Sugbo ang duha niini ka mga kauban. Unom ka basiyo sa bala sa .9mm ug duha ka slugs ang nakuha sa crime scene. – /EIM) (BANAT NEWS)
- Latest
