Babaye punggit sa trak
CEBU, Philippines – Patay na nga nadangat sa tambalanan ang 40-anyos nga babaye nga nabanggaan og Isuzu Elf sa Poblacion, Sibonga pasado ala una sa nakalabay nga hapon. Ang biktima giila nga si Leonora Campaña, taga Tuyan, dakbayan sa Naga, samtang ang drayber sa Isuzu Elf mao si Junrey Buhat, 21, ulitawo nga taga Bato, Ermita, dakbayan sa Sugbo.
Sa imbestigasyon sa kapolisan gipangulohan ni Senior Police Officer 1 Jaime Mendoza nasayran nga samtang naglakaw ang biktima sa dalan L. Mercado aksidente nga nabanggaan sa mao’ng sakyanan.
Paingon na unta moliko ang sakyanan diha’ng naharos ang biktima nga wala nabantayi sa drayber.
Suway pa unta nga gidala sa Municipal Health Center sa Sibonga ang biktima apan nakabsan gyud sa iya’ng kinabuhi.
Kung wala’y panagsabot tali sa pamilya sa namatay ug sa drayber, hayan kaso’ng reckless imprudence resulting to homicide ang atubangon ni Buhat kinsa gitanggong sa Sibonga detention cell. – /GMR) (BANAT NEWS)
- Latest
