Phivolcs mihimo’g survey sa dakbayan

CEBU, Philippines – Ang kadagkoan sa Philippine Institute of Volcanology and Seismology (Phivolcs) naghimo karon og survey sa mga dapit dinhi sa dakbayan sa Sugbo aron pagsuta kun asa nga dapit ang peligro panahon nga adunay linog.

Si Konsehal Dave Tumulak nga maoy presiding officer sa Cebu City Disaster Risk-Reduction Management Council, miuban sa team sa mga surveyors nga misuhid sa lainlaing mga dapit sa dakbayan, apil sa bukiran nga barangay sa Guadalupe.

Matud ni Tumulak nga usa ka buwan ang paghimo og survey nga gitumong aron nga ang dakbayan sa Sugbo makahimo og pagpangandam sa angay’ng pagabuhaton kun may mahitabo nga linog. Ang dakbayan sa Sugbo apil nga gitay-og sa kusog nga linog nga didto mahitabo sa Bohol kaniadtong Oktubre 15, 2013 nga nakaguba gani sa upat ka andana nga Cebu City Medical Center (CCMC) building.

Si Tumulak miingon nga sutaon sa mao nga survey kun ngano nga bisan sa ginagmay nga pagtay-og sa linog didto sa Bohol apan apil man ang dakbayan sa Sugbo nga makasinati og pagtay-og.

Matud ni Tumulak nga ang Cebu City Communication Center (C3) adlaw-adlaw nga makarehestro og ginagmay nga pagtay-og apan dili kini mabatyagan sa mga tawo. (BANAT NEWS)